Galdera hori erantzunda dago 114 eta 332 kodea daramaten galderetan. Badirudi 'sostenible' kontzeptuaren gakoa 'irautearekin' lotua dagoela, gaurko garapen-ereduak ez baitezake iraun luzaro. Dena den, Elhuyar Hiztegiak 'jasangarri' ematen du, eta 'eramangarri' ere erabili duenik bada; aldiz, Euskalterm-ek 'iraunkor' dakar; Euskaltzaindiak ere hori hobetsi du. 'Garapen iraunkor' [desarrollo sostenible] eta 'hazkunde iraunkor' [crecimiento sostenible] gomendatzen dizkizugu. Eztabaida hori Euskaltzaindiaren Terminologia Batzordeari dagokio. EHU-ko Euskara Zerbitzuak Euskaltzaindiaren erabakiak bere egiten ditu, eta kasu horretan adostasun osoz. Kontu horretan, gainera, 'iraunkor' hitzak zuk aipaturko bigarren zentzua ere bete-betean hartzen du. 'Iraungarri' tradizioan ageri da, baina beste balio bat ere badu, 'iraunarazten duena' Orotariko Hiztegiak dakarrenaren arabera. Nahasgarria gerta liteke, beraz.